මේසෙට ගැසීම සහ චෙස්

chess කියන්නේ මං පොඩි කාලේ ඉඳන්ම ආස ක්‍රීඩාවක්.

මේ දවස්වල ලෝක චෙස් මේසයත් හරිම උණුසුම්. ජනාධිපති සහෝදරයා මේසෙට ගහලා හාල් මිළ රු 20කකින්  වැඩි කරලා , හාල් මාෆියාවට උතුර දකුණ මාරුවෙන්න, කුඩුවෙන්න ගැහුවා වගේ ,ලෝක චෙස්පිටියත් උණුසුම් වෙලා තියෙන්නේ මේසට ගැසීමක් නිසා.

මේ දවස්වල නෝර්වේවල ලෝක චෙස් ශූරයන්ගෙ තරගාවලියක් පැවැත්වෙනවා. මේ තරගාවලියේ වර්තමානයේ ලෝක චෙස් ශූරතා  ශ්‍රේණිගත කිරීම් වල  ඉහලින්ම ඉන්න    කාල්සන් මැග්නස් සහභාගී වෙනවා.කාල්සන් කියන්නේ ශේණිගත කිරීම් වල ඉහළින්ම ඉන්නේ වගේම මෙතෙක් ලෝක ඉතිහාසයේ බිහිවෙච්ච ප්‍රභලතම ක්‍රීඩකයා ලෙසත් හැඳින්වෙනවා. chess ලෝකයේ  ගෝර්ට්  (GOAT ) කියලා තමයි කියන්නේ Greatest of All Time. 

ශ්‍රේණිගත කිරීම් වල ඉහළින්ම හිටියත්, ලෝක චෙස් ශූරතාවය හිමි වෙලා  තියෙන්නේ, අපේ අසල්වැසි ඉන්දියාවේ, ගුකේශ් කියන  19 හැවිරිදි තරුණ ක්‍රීඩකයෙකුට. ගුකේෂ් කියන්නේ බොහොම නිහතමානී නිහඬ චරිතයක්. කාල්සන් නම් ටිකක් ආඩම්බරකාරී අමුතු චරිතයක්.

ගුකේෂ් ලෝක චෙස් ශූරයා වුණත්, කවදාක්වත් කාල්සන්ව පරද්දල නෑ.ඇත්තටම කිව්වොත්  පසුගිය 2023 ලෝක චෙස් ශූරතා තරගාවලියට කාල්සන් සහභාගි වුනෙත් නෑ. 15 වතාවක් ලෝක චෙස් ශූරතාවය දිනලා තියෙන කාල්සන් ,  2023 තරගාවලියට සහභාගි වුණේ නැත්තේ නැත්තේ නැත්තේ,  ඒක පට්ට බෝරින් කියලා.

කොහොම හරි , නෝර්වේ වල තියෙන  තරගාවලියේදී මේ දෙන්නාම තරඟ වදිනවා. ඉතින් මීට දවස් කීපයකට කලින් ගුකේෂ් සහ කාල්සන් අතර තරඟය පැවැත්වෙනවා.

chess ්‍රේණිගත කිරීම්වලදී මැග්නස් කාල්සන් ඉන්නේ ලකුණු 2800  ට ඉහලින්.  ලෝක ශූරයා ගුකේශ් ඉන්නෙ ලකුණු 2750 ට ඉහළින්.බැලූ බැල්මට පොඩි ලකුණු වෙනසක් වගේ පෙනුනට , මේ පනහක් සීයත් අතර වෙනස  චෙස් ක්‍රීඩාවෙදි සැලකිය යුතු වෙනසක්.

ගුකේෂ් සහ කාල්සන් අතර තරඟයේදී,  එහි අවසානය වෙන තෙක්ම වගේම තරඟයේ වැඩි වාසි හිමිවෙලා තිබ්බේ කාල්සන්ට. එහෙත් තරඟය අවසානයේ ඉතිරි වෙලා තිබ්බ සුළු කාලයත් එක්ක කාල්සන්ගේ අතින් එක වැරදි  move එකක් ඇදෙනවා. ඒ වගේ  එක වැරදි move එකකට චෙස් භාෂාවෙන් නම් අපි බ්ලන්ඩර් කියල කියනවා .මේ බ්ලන්ඩර් එකත් එක්ක, එතෙක් වෙලා දිනලා හිටපු කාල්සන් එකපාරට  පරාජය පිළිගන්න සිද්ධ වෙනවා. කවදාවත් ගුකේශ්ටා පැරදිලා තිබ්බෙ නැති  කාල්සන්ට ලොකු ශොක් එකක්.

ඒකත් එක්කම කාල්සන් අත මිටමොලවලා මේසෙට ගහනවා.ගහපු ගැහිල්ලට බෝඩ් එක උඩ විසි වෙලා ඉත්තොත් සීසීකඩ යනවා.ඉතින් බුද්ධිමත් අයගේ ක්‍රීඩාවක් වුන චෙස් ක්‍රීඩාවෙදි මේ වගේ හැසිරීමක්  සැලකෙන්නෙ , ග්‍රාම්‍ය විදිහට..

ඒ නිසාම, කාල්සන්ට එදිරිව ඉන්දියාවේ දහනම හැවිරිදි  ගුකේෂ්ගේ ජයග්‍රහණය වගේම,අනපේක්ෂිත පරාජය ඉදිරියේ කාල්සන්ගේ  ගොන් පාට් එකත් ලෝක චෙස්පිටියේ මේ දවස් වල ටිකක් උණුසුම් මාතෘකාවක් වෙලා.

මේසට ගහන ගොන් පාට් දැකලා පුරුදු ලංකාවේ අපට නම් මේවා එච්චර  නුපුරුදු දේවලුත් නෙමේ...😁😁

ට්‍රම්ප්ගෙ බදු ගැහිල්ල සහ හදුන්නෙත්තිගෙ දැනුම

ඇමෙරිකානු ට්‍රම්ප් පාලනය යටතේ ලංකාවට පනවලා තියෙන 44% ක බද්දත් එක්ක ඉදිරියේදී ලංකාවට ඇමෙරිකානු වෙළදපොල වැසී යෑමේ අනතුරක් තියෙනවා. මේකෙන් කොච්චර ලොකු  බලපෑමක් ලංකාවට වෙනවද කියලා තේරුම් ගන්න මේ ප්‍රස්තාරය  උදව් වෙනවා. ප්‍රස්තාරයේ තියෙන්නෙ ලංකාව විවිධ රටවල් එක්ක, භාණ්ඩ හා සේවා ගණුදෙනු කිරීම නිසා ඇති උන වෙළද ශේෂය. 

මේ අතරින් ධන වෙළද ශේෂයක්, ඒ කියන්නේ ආනයනයට වඩා අපනයනය, කරලා, අන්තිමේදි ඩොලර් උපයලා තියෙන්නේ රටවල් කීපයක් එක්ක විතරයි.

ඇමෙරිකාව, එංගලන්තය, ජර්මනිය, නෙදර්ලන්තය,ඉතාලිය තමයි අපි ප්‍රධාන වශයෙන් ඩොලර් හම්බු කරපු රටවල්. මේවගෙන් ලංකාව වැඩිම ඩොලර් හම්බු කරලා තියෙන්නේ ඇමෙරිකාවෙන්. ඒක ඩොලර් බිලියන 3ක්. ඊලඟට ඉන්න එංගලන්තයෙන් අපේ රටට එන්නෙ ඩොලර් බිලියන 1ක් විතර.ඉතින් අපිට මේ ඩොලර් බිලියන 3 ක් අහිමි වෙනවා කියන්නේ කොච්චර ලොකු කම්පනයක්ද කියන එක හිතා ගන්න පුලුවන්නෙ.

මේ වගේ අලකලංචියක් අස්සේ තමයි මාලිමාවේ හදුන්නෙත්ති පුරසාරම් කියෙව්වෙ ට්‍රම්ප්ගෙ බදු ගැහිල්ල අපිට එච්චර ලොකු නෑ කියලා. පස්සෙ කවුරු හරි දැනුවත් කරලා එයා ඒක නිවැරදි කරලා නම් තිබ්බා. ඒත් ඉතින් එයාගේ දන්න තරම හිතා ගන්න පුලුවන්නේ.. 

ට්‍රම්ප්ගේ නව තීරුබදු කම්පනය: ගෝලීය බල ක්‍රීඩාවක් - සහ ශ්‍රී ලංකාවට එයින් අදහස් කරන්නේ කුමක්ද

ට්‍රම්ප්ගේ අලුත් බදු ගැසීම අපි තේරූම් ගන්න ඕනේ ඒකේ දේශපාලන සංධර්භයත් එක්ක. ට්‍රම්ප්ට ඕනේ ඇමෙරිකාව නැවත එහි ශ්‍රේෂ්ඨත්වය කරා ගෙන යන්න.

මේ බදු ගැහිල්ල එහි ආරම්භයයි. යන සිස්ටම් එක තමන්ට අවාසි නම් ඉස්සෙල්ලම කරන්නේ, ඒ සිස්ටම් එකට එකවර ශොක් එකක් දෙන එක.හෙන ගහනවා වගේ එලියට දාපු මේ වැඩේන් කලේ, ඒ ශොක් එක දෙන එක.මේක ඊට වඩා ලොකු ප්ලෑනක ආරම්භය විතරයි.

ඊලඟට එන්නේ මේ බදු අඩුකර ගන්න එක් එක් රටවල් එක්ක කෙරෙන ද්වි පාර්ශික සාකච්චා. ලංකාවේ නම් දැනටම ආන්ඩුවේ අයත්, විපක්ශයේ අයත් කියන්නේ කථා කරලා , ගොඩ දා ගන්න පුලුවන් වෙයි කියන උත්තරය තමයි. ඒ අතින් අධිරාජ්‍ය විරෝධී පක්ශයක් ලෙස හිටපු ජවිපේ, මාලිමාව හරහා ඇමෙරිකාව එක්ක සාකච්චා කරන්න ඕනේ කියන අස්ථානයට විතැන් වීම අපි අගය කරන්න්න ඕනෙ.

මේ සාකච්චා වලදි ඇමෙරිකාව එක ගලෙන් කුරුල්ලො දෙන්නෙක් බා ගන්න තමයි හදන්නේ.

පලවෙනි කාරණය හැටියට , ට්‍රම්ප් පාලනය මේක පාවිච්චි කරන්න හදන්නේ රටවල් අතර වෙන් වෙන් වශයෙන් සිදුවෙන සාකච්චා වලදි තමන්ගේ දේශපාලන කූට්ටිය ඉල්ලීමේ උපකරණයක් ලෙස.ලංකාව වගේ රටකට වැදගත් වෙන්නෙ මේ කාරණය තමයි. මොකද ලංකාව වගේ සොච්චම් ආර්ථිකයක් එක්ක ඇමෙරිකාවට විසදගන්න වෙන ගණුදෙනු නැති හින්දා. ලංකාවේ ඇතුලට පහුගිය දශකයේ වේගයෙන් බලවත් උන චීන දේශපාලනයත් , ලංකාවේ චීණ නැඹුරුවත් දිහා අලුත් විදිහකට බලන්න මාලිමා ආන්ඩුවට සිද්ධ වේවි.

පසුගිය දශක දෙක ඇතුලෙදි චීනය ඇමෙරිකාවට බඩු විකුනලා ඇමෙරිකාවේ තිබ්බ කර්මාන්තශාලා තමන්ගෙ රටට ගෙනාව. ඒ සල්ලි වලින් දැන් චීනය ආර්ථික අතින් විතරක් නෙමෙ යුද්ධමය අතිනුත් ඉස්සරාට ඇවිල්ලා. දැන් ඇමෙරිකාවට ඕනේ තමන්ගේ ගෙදරට ඇවිල්ල බඩු විකුණපු මනුස්සයා තමන්ට ගෙම්බර් පාට් දාන්න එන්න කලින් ඒක විසදගන්න.

එතකොට කාට හරි අහන්න පුලුවන් ඕක කරන්න මුලු ලෝකේටම බදු ගහන්න ඕනේද කියලා. ඉතා නිවැරදි ප්‍රශ්ණයක්.

ඇත්තටම ගත්තොත් ට්‍රම්ප්ගේ පලවෙනි ධූර කාලේදි කලේ චීනෙට විතරක් ටැරිෆ් ගහපු එක තමයි. හැබැයි චීනය කලේ ඇමෙරිකාවට බඩු යවනවා වෙනුවට ලතින් ඇමෙරිකාවට තමන්ගේ බඩු යවපු එක. ලතින් ඇමෙරිකාව හරහා නැවත චීන බඩු ඇමෙරිකාවට ආවා.

දැන් ට්‍රම්ප් ඒ වැරැද්ද හදලා අලුත් වටයකින් තමන් මුලින් පටන් ගත්ත වැඩේ කර ගෙන යනවා.

එතකොට යුරෝපයට වගේ ඇමෙරිකානූ කදවුරේ හිට ගත්ත අයට බදු ගැහුවේ ඇයි කියලා කාට හරි තව ප්‍රශ්ණයක් ඇති වෙන්න පුලුවන්. ඒතමයි ඇමෙරිකාව නේටෝ එකේ යුරෝපයේ අරක්ශකයා හැටියට හිටියට ආර්ථික වශයෙන් ලාභයක් නැති වෙන එක. ඒ වෙනුවට ට්රම්ප් කියන්නේ හරි මම උඹලට ආරක්ශාව දෙන්නම්ම් හැබැයි ඒකට යන වියදම මට දෙන්න.ඇමෙරිකාවෙන් බඩු අරං ආරක්ශාවට යන මුදල හවුලේ බෙදා ගමු කියන එක තමයි ඇමෙරිකානු හිතවාදී කදවුර සදහා ට්‍රම්ප් මේ කියලා තියෙන්නෙ.